Тырыш кешегә ауылда йәшәүе ауыр түгел

Бына ошо көндәрҙә улар хужалығында ҙур өмә үтте — берҙәм күршеләр бергәләп, мал сөгөлдөрө уңышын йыйып алды. Ә сөгөлдөрҙө уңған хужалар бик күп ултырта, сөнки өс һыйыр, ҡышлаған, өс быҙау, 20-нән артыҡ һарыҡ өсөн етерлек аҙыҡ әҙерләргә кәрәк.

• Дөрөҫөн генә әйткәндә, мал сөгөлдөрөн бәрәңгегә ҡарағанда күпкә күберәк ултыртабыҙ. Сөнки сөгөлдөр ашаған малдың ите тәмле була. Йыл да шулай күпләп үҫтереп, күршеләр, туғандар менән бергәләп йыйып алабыҙ. Ауылда йәшәүе ауыр, тиҙәр. Уңған кешегә бер ҙә ауыр түгел ул. Беҙ ҙә тормош иптәшем менән 33 йыл элек ауылға күсеп ҡайтҡайныҡ, бер ҙә үкенмәйбеҙ, — ти Нәзилә Ғәлләм ҡыҙы.

Фаат Ҡәтифйән улы — Солтанай ауылынан, ә Нәзилә Ғәлләм ҡыҙы сығышы менән Балтас районынан. Сәфиуллиндар 1990 йылда Свердловск өлкәһе Динас ҡасабаһынан күсенеп ҡайтып Яубүләк ауылына төпләнә. Ике ҡыҙға ғүмер бүләк итәләр. Нәзилә апай 25 йылдан артыҡ урындағы почта бүлеге етәксеһе булып эшләй, ә Фаат ағай себер яҡтарында вахта ысулы менән хеҙмәт һала. Хәҙер улар өс ейән-ейәнсәргә хәстәрлекле олатай-өләсәй ҙә булған.

Бына шулай күпләп мал аҫрап, донъяларын гөл-сәскәгә күмеп, балаларына терәк-таяныс булып, туғандары, ауылдаштары менән яҡшы мөғәмәләлә, татыулыҡта ғүмер кисерә Сәфиуллиндар.

Илһөйәр Махатова.