Бай күргәҙмә байрамға йәм өҫтәне

Күргәҙмәлә уңған, алтын ҡуллы райондаштарыбыҙ етештергән төрлө продукция һәм ағас, ҡул эше, һынлы сәнғәт оҫталарының эштәре менән танышырға мөмкин ине. Мәҫәлән, байрам ҡунаҡтары һәм сараға килеүселәр иғтибарына Ҡубияҙ ауылынан “Нуртдинов Ф.” крәҫтиән-фермер хужалығы — һөт ризыҡтары, Асҡындан шәхси эшҡыуар А. Абдуллин — икмәк-булка изделиелары, “Танып” шифаханаһы — минераль һыу, Ҡаҙансы төбәге ағинәйҙәре дарыу үләндәре тәҡдим итте. Күргәҙмәгә шулай уҡ Ҡышлауйылға ауылынан Ғәлиевтар ғаиләһе үҙҙәре үрсеткән бүҙәнәләрҙе һәм ҡорт балын, Асҡындан Сәғитовалар үҙҙәренең ҡайын туҙынан эшләнгән һоҡланғыс картиналарын, Иҫке Ҡарткиҫәктән Илдар һәм Азат Мулләхмәтовтар умартасылыҡ продукцияһын ҡуйғайны. Ҡунаҡтарҙың иғтибарын Фәридә апайҙың кейеҙҙән эшләнгән картиналары һәм Ғәйнетдин ағай Хөснөтдиновтың ағастан эшләнгән көнкүреш әйберҙәре лә йәлеп итте.

Илһөйәр Махатова.

Автор фотолары.