Батырлыҡҡа һәм дуҫлыҡҡа баш эйеп

Милли батырыбыҙ Салауат Юла­ев­тың тыуыуына 266 йыл тулыу ай­ҡанлы төбәк етәксеһе ҡурай моңо аҫтында уның һәйкәленә сәскә һалды. Тантанала Башҡортостан Хөкү­мәте Премьер-министрының беренсе урынбаҫары Андрей Назаров, Дәүләт Йыйылышы – Ҡоролтай Рәйесе Константин Толкачев та ҡатнашты.

Рәсәйҙәге һәм Европалағы иң ҙур атлы һәйкәл Сосланбәк Тавасиев проекты буйынса бар­лыҡҡа килде. Ул 1967 йылда асылғайны. Һәйкәл 10 метр­лыҡ гранит постамент һәм 9,6 метр бейеклектәге ат ста­туя­һынан тора, уны Ле­нинградтың “Монументскульптура” заводында ҡойғандар. Ошо эше өсөн Сосланбәк Тавасиев 1970 йылда СССР-ҙың Дәүләт премияһына лайыҡ булған.

Рәсәй көнө айҡанлы Баш­ҡортостан Башлығы Дуҫлыҡ монументына сәскә һалды. Ул Башҡортостандың Рәсәй дәү­ләтенә үҙ ирке менән ҡушы­лыуына 400 йыл тулыу айҡан­лы асылғайны. Һәйкәлде 1957 йылда эшләй башлайҙар, 1965 йылда ул тантаналы асыла. Монумент башҡорт һәм рус халҡының бөйөк дуҫлығын сағылдыра.