"Башҡорт аты"ның гимнын кем яҙған?

Бынан алда республикала фестивалдең төп йырына конкурс иғлан ителгәйне. Композитор Рәмил Туйсин еңеүсе булды. Ул «Башҡорт аты» гимнының барлыҡҡа килеү тарихын һөйләне.

- Конкурс иғлан ителгәс, шағирә Фирүзә Абдуллина менән ҡатнашырға булдыҡ, - тип фекерҙәре менән уртаҡлашты Рәмил Париж улы. - Элек эстрада йырҙарын бергәләп ижад итеү буйынса уртаҡ тәжрибәбеҙ бар ине, һәм был идея беҙгә ҡыҙыҡлы тойолдо. Мин үҙем музыкант-фольклорсы, хәрби темаға арналған башҡорт халыҡ йырҙарында, көнкүреш йырҙарында ла аттар йыш телгә алыныуын яҡшы беләм. Шуға күрә артыҡ баш ватырға тура килмәне; һүҙҙәр ҙә, көй ҙә үҙенән-үҙе тыуҙы. Йырҙың яңғырашын замансараҡ итергә тырыштыҡ.

Композитор әйтеүенсә, ул да, Фирүзә лә Баймаҡ районында үҫкән. Башҡорт атының гимнын ижад иткәндә бала сағын, тыуған ауылын йыш иҫкә төшөргән.
- Был минең тарихым, уның менән илһамландым, — ти Рәмил Туйсин.

Гимн «Башҡорт аты» фестивалендә ат парадында "Атайсал" ансамбле башҡарауында яңғыраны.

Башҡорт атына арнап гимн яҙыу тәҡдимен Баймаҡ районы эшҡыуары, йылҡысылыҡ менән шөғөлләнгән Илнур Биктимеров индерҙе.

Фото: "Башинформ.