Асҡында һәләтле балаларҙы тәбрикләнеләр

Республика һәм Бөтә Рәсәй конкурстарында, олимпиадаларҙа, спортта, ижадта ҙур уңыштарға ирешкән белемле, ышаныслы, һәләтле, илһөйәр һәм телһөйәр уҡыусыларҙы һәм уларҙың остаздарын  район хакимиәте башлығы Динис Йосопов, уның урынбаҫары Эльза Әхмәтгәрәева, район мәғариф бүлеге начальнигы Зөлфирә Селянина, район Советы секретары Рима Нәбиуллина һәм башҡа етәкселәр  тәбрикләп, ҡотлау  һәм рәхмәт һүҙҙәре еткерҙе.

Уҡыусылар  “Лидер”, “Өмөтлө спортсылар”, “Беҙ  - команда”, “Йәш илһөйәрҙәр”, “Тикшеренеүселәр”, “Овация”, “Ватанды данлайым”, “Асҡын районы ғорурлығы” тип аталған номинацияларҙа бүләкләнде. Бүләктәрҙе иһә  меценаттар -   район мәҙәниәт бүлеге, район башҡорттары ҡоролтайы, “Батыр” физкультура-һауыҡтырыу комплексы, «Bright» үҫеш студияһы етәкселәре, Иҫке Ҡаҙансы урта мәктәбе директоры, район Советы депутаттары әҙерләгәйне.

Тантаналы сара  балаларҙың  сағыу концерт номерҙары менән үрелеп барып, бик йәмле, йәнле, матур үтте һәм барыһына ла онотолмаҫ тәьҫораттар бүләк итте.

Тулыраҡ район гәзиттәрендә уҡырһығыҙ.