Иҫән-һау хеҙмәт итеп ҡайтығыҙ, егеттәр!

Иртә таңдан өс егет хәрби хеҙмәткә юлланды: Көнгәк ауылынан Марлен Әхәтуллин, Ҡубияҙан Тимур Закиров һәм Әмирҙән Азамат Хәбибуллин. Уларҙы ата-әсәләре, туғандары һәм яҡындары оҙатты.

Сарала  район хакимиәте башлығы Динис Йосопов һәм уның  социаль мәсьәләләр һәм кадрҙар сәйәсәте буйынса урынбаҫары Эльза Әхмәтгәрәева  ла ҡатнашты һәм өгөт-нәсихәт һүҙҙәре менән сығыш яһаны. Улар балаларға һаулыҡ, алдағы хеҙмәттә уңыштар һәм рух ныҡлығы теләне.

- Армияла хеҙмәт итеү — илебеҙҙә ир-егеттәрҙең абруйлы бурысы. Хеҙмәт итергә ҡарар итеп, һеҙ ысын ир- егеттәргә лайыҡлы яуаплы аҙым яһайһығыҙ. Ҡәҙерле призывниктар,  армия тормошондағы бөтә ауырлыҡтарҙы ла түҙемлек менән үтеүегеҙгә ышанам. Бер йыл һеҙҙең өсөн һиҙҙермәйенсә үтһен, армияла хеҙмәт итеү һеҙгә  көс-ҡеүәт, физик һәм рухи  сынығыу  өҫтәһен. Тыуған районыбыҙға иҫән-һау хеҙмәт итеп,  ныҡлы, көслө булып ҡайтығыҙ! Үҙегеҙҙе һаҡлағыҙ һәм сәләмәт булығыҙ, — тине Динис Рәдис улы, хәрби хеҙмәткә саҡырылыусыларға мөрәжәғәт итеп.

Бөтә призывниктарға ныҡлы һаулыҡ, рух көсө һәм иҫән-һау хеҙмәт итеп ҡайтыуҙарын теләйбеҙ! 

Наилә Имаева.