Ҡыйғаҙыла яңы почта бүлексәһе асылды

Рәсәй Президенты Владимир Путиндың ҡушыуы буйынса  төбәктә “Берҙәм Рәсәй” партияһы ярҙамы менән 2022 йылда почта бүлексәләре яңыртыла башланы. Ошо көндәрҙә Ҡыйғаҙы  ауылында ла  яңы почта бүлексәһе асылды

Тантаналы сарала   район хакимиәте башлығы Динис Йосопов,  Петропавловка ауыл биләмәһе башлығы Альбирт Ҡәҙимов, Бөрө почтамты  начальнигы  Данис Ғилфанов ҡатнашты. Почта бүлексәһен асыу  ҡыйғаҙылар өсөн ҙур байрамға әйләнде. Заманса бина ауылға йәм биреп, үҙенә саҡырып тора. Район Мәҙәниәт йорто  хеҙмәткәрҙәре сараға дәрт өҫтәне, ә автоклуб һәр ваҡыттағыса ярҙам итте. Байрам тантанаһын урындағы мәктәп директоры Динә Хәсәнова менән  ауыл мәҙәниәт йортонда мәҙәни саралар ойоштороусы Зәлифә Ибраһимова алып барҙы.

Ауылда почта бүлексәһе эшләүҙең мөһимлеген  Динис Рәдис улы  тәбрикләү сығышында билдәләне. Яңы почта бүлексәләрен асырға һәм  эшләгәндәрен яңыртырға мөмкинлек биргән программа өсөн ул  ил Президентына рәхмәт белдерҙе.
— Тиҙ күтәрелә торған конструкциянан булған почта бүлексәһе бинаһы районыбыҙҙа әлегә беренсе. Үткән йыл беҙ Рәсәй почтаһы ярҙамы менән Асҡын ауылында  үҙәк офисты ремонтланыҡ. Дөйөм алғанда, Ҡыйғаҙы  ауылында үткән йыл  һеҙҙең әүҙемлегегеҙ ярҙамында кәрәҙле бәйләнеш индерҙек,  быйыл  юлға таш һалынды, уны асфальтлау һәм мәктәпте ремонтлау  планға индерелде. Ауылда төҙөкләндереү эштәре дауам ителәсәк,  - тине Динис Рәдис улы.

Данис Рәшит улы ла  ҡыйғаҙыларҙың шатлығын уртаҡлашты.
— Район етәкселегенең, шәхсән Динис Рәдис улының беҙҙең эшкә яуаплы мөнәсәбәте һөҙөмтәһендә,  яңы бинаны төҙөү өсөн ер ҙә, тейешле документтар ҙа ваҡытында бирелде. Район  хакимиәте тарафынан тағы ла ошондай 11 документ әҙерләнде.

Яңы почта бүлексәһенә  ҙур аҡса һалынды. Бина эсе  почта хеҙмәтен күрһәтеү  өсөн заманса йыһазландырылды. Бирелә туғыҙ йыл начальник булып Эрена Мулланур ҡыҙы эшләй. Ул ауылда ихтирамлы кеше. Һеҙ бында килеп,  хат ебәрә һәм кәрәкле тауар һатып  ала алаһығыҙ, коммуналь түләүҙәрҙе лә түләргә мөмкин, — тине Данис Рәшит улы.

Яңы бина операциялар залына,  клиент һәм почтальондар өсөн тәғәйенләнгән бэк-зонаға бүленгән. Бында шулай уҡ санузел, мебель, яңы стендтар, һатыу кәштәләре ҡуйылған.

Бүлексәлә  компьютер һәм Интернет мөмкинлектәрен бушҡа файҙаланыу урыны ла ҡаралған. Ишек төбөндә мөмкинлектәре сикләнгән кешеләр һәм коляскалы әсәләр өсөн пандустар ҡуйылған, персоналды саҡырыу төймәләре монтажланған. Бынан тыш, бүлексәләрҙә тәҡдим ителгән хеҙмәттәр ассортименты киңәйтелде. Почта клиенттары бында “Дәүләт хеҙмәттәре” порталында иҫәп яҙмаһын раҫлай, кәрәк булһа, температураны, баҫымды һәм сатурацияһын үлсәргә мөмкин.