Асҡындар “Уйын” конкурсында бик матур итеп сығыш яһаны

Асҡында уҙған “Башҡорт йолалары вариҫтары” II асыҡ халыҡ ижады фестивале сиктәрендә ойошторолған “Уйын” конкурсында Асҡын районынан биш ижади коллектив ҡатнашты.

Улар:

- район Мәҙәниәт йортоноң Зәнилә Рыбина етәкләгән “Хазина” халыҡ фольклор коллективы,

- Иҫке Ҡаҙансы күп функциялы ауыл клубының Вәсилә Хәбибрахманова етәкселегендәге “Ихлас” фольклор коллективы,

- Үршиҙе ауыл клубының Альбина Насырова етәкләгән “Гөлнәзирә” фольклор коллективы,

- Упҡанкүл ауыл мәҙәниәт йортоноң Зөбәржәт Әминева  етәкләгән фольклор коллективы,

- Урмияҙ ауыл мәҙәниәт йортоноң Гөлсәсәк Абдуллина менән Фидания Йосопова берлектә әҙерләгән “Ынйылар” балалар фольклор коллективы.

Йырлы -бейеүле “Ултыр, ултыр, Мәликә!” тигән уйынды сәхнәләштереүсе   “Ынйылар” балалар фольклор коллективы конкурстың 2-се дәрәжә дипломына лайыҡ булды. Уларҙың үҙ ерлегенә хас йыр, бейеү, таҡмаҡтарын жюри ағзалары ла юғары баһаланы. Халҡыбыҙҙың ошо рухи мираҫын йәш быуынға тапшырыусы мәҙәниәт хеҙмәткәрҙәренә рәхмәт белдерҙеләр.

“Ҡыҙ яусылау” йолаһын  шундай матур, йәнле итеп сәхнәләштергән “Хазина” фольклор коллективы сығышын да жюри ағзалары юғары баһалай. Тик конкурс  шарттарына ярашлы, уларҙың сығышында ерле уйындарҙың аҙ булыуы дөйөм баһаға кире йоғонто яһай. “Хазина” коллективы номинацияла  бүләкләнде.

Ҡалған өс коллектив  та Асҡын районы ерлегенә хас уйындарҙы тергеҙеп, бик матур  сығыш яһаны. Улар ҡатнашыусы дипломы һәм иҫтәлекле бүләктәр менән бүләкләнәсәк.

Үҙешмәкәр сәнғәттә ҡатнашыусылар  һәм уларҙы ошо бәйгегә әҙерләүсе етәкселәргә  онотолоп барған уйындарҙы тергеҙеп, сәхнәлә күрһәткән өсөн “афарин!”  һәм алда ла уларға  тик уңыштар теләйбеҙ!

Наилә Имаева.