Солтанбәктә өләсәйҙәр балалары һәм ейән-ейәнсәрҙәре менән бергәләп башҡорт теленән диктант яҙҙы

Солтанбәктәр һәр ваҡыттағыса әүҙемлектәре менән һоҡландырҙы.  Иртә менән милли кейемдәрен кейеп, милли биҙәүестәрен тағып, байрам рухы өләшеп, ейән-ейәнсәрҙәрен эйәртеп өләсәйҙәр башҡорт теленән диктант яҙырға килде мәктәпкә.

“Мәктәбебеҙ  гөрләп торҙо. Рәсәйҙә иғлан ителгән  Ғаилә йылы сиктәрендә диктант яҙырға ғаиләләр менән килде ауылдаштар.

Солтанбәк ауыл биләмәһе башлығы  Лилиә Салауат ҡыҙы Ғиләжева  диктант яҙырға әсәһе Дилбәр Фәтих ҡыҙы  Мазһарова,  ҡыҙҙары Сабина һәм Диана менән  килде.

  Ауылдың хөрмәтле ағинәйе   Рәйсә Ниғмәтйән ҡыҙы Суфиянова  килендәре Ләйсән, Сулпан, Фәнзиә, улы Данис, ейәндәре Ильяс, Динислам, Илшат, Сөләймән, ейәнсәрҙәре Гүзәл менән бергәләп диктант яҙҙы.

Бар ғүмерен балаларға белем биреүгә бағышлаған хөрмәтле остаз , мәғариф ветераны  Зәбидә Мәркәз ҡыҙы Исламова ҡыҙы Эльза, ейәнсәрҙәре Гүзәл, Элиза менән килде.

 Йыр-моңға ғашиҡ әүҙем  өләсәй  Сабирә   Хәтипйән ҡыҙы Ғилманшина ла ҡыҙы Рәмилә, ейәнсәрҙәре  Гүзәл, Регина, ейәне Айнур менән килеп, башҡорт теленән белемен тикшереп ҡараны.

 Солтанбәк мәктәбе уҡытыусылары, уҡыусылары, техник хеҙмәткәрҙәре, шулай уҡ балалар баҡсаһы коллективы, ауыл мәҙәниәт йорто коллективы һәм әүҙем ағинәйҙәр ҙә   ҙур теләк менән "Башҡорт теленән халыҡ-ара диктант" акцияһына ҡушылды.

Беҙҙең майҙансыҡта барыһы ла  башҡорт телен яҡшы белгәндәр өсөн тәғәйенләнгән Мөнир Ҡунафиндың  “Бала саҡтың илаһи таңдары” тексын яҙҙы  ”,  — тип хәбәр итте Солтанбәк урта мәктәбе директоры вазифаһын башҡарыусы, диктантты ойоштороп үткәреүсе Розалия Марат ҡыҙы Факкарова.

Афарин, солтанбәктәр! Һәр ваҡыт шулай рухлы, әүҙем, берҙәм, телһөйәр булып, йәш быуынға матур өлгө күрһәтеп йәшәгеҙ!

 Наилә Имаева.