Яугир әсәһенә ярҙам итәләр

Солтанбәк  мәктәбендә Тимур командаһы әленән-әле изге эштәре менән һөйөндөрөп тора. Ҡышҡы миҙгелдә улар ярҙамға мохтаж кешеләргә барып, йорт алдарын, һуҡмаҡтарҙы ҡарҙан таҙартырға ярҙам итә.

9 февралдә 8-се һәм 9-сы класс уҡыусылары  уҡытыусы апайҙары Зилә Исламова һәм Розалия Факкарова етәкселегендә  махсус хәрби операцияла ҡатнашыусы яугир әсәһе  Гөлсөм Ғилмулла ҡыҙы Имамоваға барып, йорт алдарын, һуҡмаҡтарҙы, утынлыҡ эргә-тирәһен ҡарҙан таҙартырға булыша.

Эш тамамланғас, уҡыусыларҙы Гөлсөм апай тәмлекәстәр менән сәй эсергә саҡыра. Шулай, бергәләшеп сәй эсеп, табын артында һөйләшеп, яңғыҙы йәшәүсе Гөлсөм апайҙы ҡыуандырып ҡайта йәш тимурсылар.

Солтанбәктәргә – афарин! Шулай изге эштәрегеҙ менән донъяны йәмләп йәшәгеҙ, тырышып уҡығыҙ! Изгелек өләшкәндән  арта ғына!

Наилә Имаева.