Балтас егете лауреат булды!

Ошо көндәрҙә Асҡында сәләмәтлек мөмкинлектәре сикле балалар һәм  үҫмерҙәр араһында «Өмөт фәрештәләре – 2022» фестивале уҙҙы.

Әлеге фестиваль Башҡортостан Республикаһының төньяҡ-көнбайыш райондары араһында ойошторолдо.

Һайлап алыу турынан һуң Бөрө, Асҡын, Ҡариҙел, Балтас, Илеш, Тәтешле һәм Дүртөйлө райондарынан көслө ҡатнашыусыларға Гала-концертта сығыш яһау бәхете тейҙе.

Балтас районы данын Балалар сәнғәт мәктәбенең вокал бүлеге уҡыусыһы Николай Дарин лайыҡлы яҡланы. “Вокал” номинацияһында ул 2-се дәрәжә лауреат исеменә лайыҡ булды.

Николайҙы һәм уның уҡытыусыһы Рәзидә Әхмәтованы ысын күңелдән лайыҡлы еңеүе менән ҡотлайбыҙ! Киләсәктә лә ижади уңыштар теләйбеҙ!

Фирғәт Нәбиуллин.