Альмира ла студент булды!

Альмира бәләкәйҙән  тырыш, егәрле, белемгә ынтылыусан булып үҫә. Мәктәп йылдарында ла тик яҡшы билдәләргә өлгәшә.  Иң яратҡан дәресе география була.  Үҙ эшенең оҫтаһы булған тәжрибәле уҡытыусы Гөлсинә Ғайфулла ҡыҙы Ғәдиева шулай уҡыусыһында география фәненә ҡарата һөйөү уята. Бергәләп төрлө конкурстарҙа, олимпиадаларҙа ҡатнашып, еңеү артынан еңеү яулайҙар.    Быйыл иһә Альмира географиянан  төбәк олимпиадаһында призер булып,  аҡсалата бүләк тә ала.  “Аҡмулла уҡыуҙары”нда ла  призер була Альмира. Берҙәм дәүләт имтихандарына ла ентекле әҙерләнеп, рус теле,  математика һәм географиянан юғары балдар йыя.

Һөнәр һайлау мәсьәләһе тыуғас, ул Өфөләге һәм Ҡазандағы юғары уҡыу йорттарына  экология һәм тәбиғәтте файҙаланыу факультеттарына документтарын бирә. Тырыш ҡыҙ бөтә ергә лә конкурстан уҙа. Бала саҡ хыялын тормошҡа ашырып, документтарын Ҡазан (Волга буйы) федераль университетының   Экология һәм тәбиғәтте файҙаланыу институтына илтә. Альмира гидрометеорология факультетында белем аласаҡ!

• Минең өс балам да бәләкәйҙән тәбиғәтте яратып, мәктәпкә барғас, географияны бик яҡын күреп, мауығып уҡыны. Өлкән улым бөгөн БДУ -ның Бөрө филиалында эколог һөнәрен үҙләштерә. Бына 4-се курсҡа барырға йыйына. Альмирам иһә быйыл Ҡазанға уҡырға инде. Ул гидрометерология белгеслеген һайланы. Бәләкәйе Линара 6-сы класҡа бара. Ул да географияны бик ярата. Өс баламды ла Гөлфинә Ғайфулла ҡыҙы уҡытты. Форсаттан файҙаланып, Асҡын 2-се урта мәктәбе уҡытыусыларына һәм айырыуса Гөлсинә Ғайфулла ҡыҙына ҙур рәхмәттәремде еткерәм. Яңы уҡыу йылында педагогтарға тик уңыштар һәм, иң мөһиме, иҫәнлек-һаулыҡ теләйем, — ти дүрт бала әсәһе Айгөл Рәйес ҡыҙы.

 Альмираға мауыҡтырғыс студент  йылдары һәм уңыштар теләйбеҙ! Бай хыялдары тормошҡа ашһын! Аҡ юл һиңә, Асҡын һылыуы!

Наилә Имаева.