“Йәшлек”тәр финалға сыҡты

Өфөлә “Байыҡ” республика телевизион конкурсының II туры үтте. Унда Ҡариҙел районы “Йәшлек” халыҡ бейеүҙәре ансамбленең өлкәндәр төркөмө лә уңышлы сығыш яһай.
Төрлө йәштәге һәм төрлө өлкәләрҙә эшләгән ҡатын-ҡыҙҙар башҡарыуында “Унлар байығы” бейеүен жюри ағзалары юғары баһалай. Улар башҡарыусыларҙың һәм бейеү ҡуйыусының юғары оҫталығын, костюмдарҙың тура килеүен дә һыҙыҡ өҫтөнә ала.”Йәшлек”тәр һөҙөмтәлә 50 балл йыйып, Гала-концертта сығыш яһау хоҡуғына эйә була.
— Ҡариҙел бейеүселәренән башҡа беҙҙең конкурсты күҙ алдына ла килтереүе ҡыйын, сөнки улар — бәйгенең биҙәге, йәме, яңы һулыш һәм күтәренке рух, дәрт өләшеүсеһе. БР-ҙың атҡаҙанған мәҙәниәт хеҙмәткәре Рәфилә Мөнирова етәкләгән коллектив һәр йылды йондоҙ булып балҡып, көслө алҡыштарға күмелә, — ти проекттың авторы, БР-ҙың атҡаҙанған матбуғат һәм киң мәғлүмәт хеҙмәткәре Рита Өмөтбаева.
“Йәшлек” халыҡ бейеүҙәре ансамбленә яңынан-яңы уңыштар юлдаш булһын!
З.Зарипова.