Бөтә ауыл менән Яңы йылды ҡаршы алалар

Ауыл китапханаһы эргәһендә китапханасы Гөлфинә Исламова етәкселегендә эшләп килгән төрлө клуб ағзалары Мәмдүнә Зарипова етәкселегендәге ағинәйҙәр, ауыл Советы һәм депутаттар менән берлектә урындағы халыҡ өсөн күңелле байрам ойоштора. Сарала олоһо ла, кесеһе лә, хатта күрше ауылдарҙан да килеп, ҙур теләк менән ҡатнаша. Фольклориадаға әҙерлек сиктәрендә үткәнгә күрә, ҡаҙансылар программаға халҡыбыҙҙың онотолоп барған уйындарын, йырҙарын да индерәләр. Йыр-бейеү, тапҡыр һүҙҙәр, ҡотлауҙар, төрлө ярыщтар, уйындар менән үрелеп барған сараны Мәмдүнә Зарипова менән Раушания Хажиәкбәрова күңелле итеп алып бара. Байрамға килеүселәрҙе Яңы йыл менән ауыл биләмәһе башлығы Илдар Денисламов, район Советы депутаты, урындағы мәктәп директоры Мансур Нуриәхмәтов, ауыл Советы депутаттары, атайҙар советы, ағинәйҙәр, урындағы ҡатын-ҡыҙҙар советы рәйестәре ихлас ҡотлап, изге теләктәрен еткерә.