Яҡташыбыҙ менән ғорурланабыҙ

Армияла саҡта уҡ контракт төҙөп, Дағстанда хеҙмәт иткән “Нурик” хәрби операцияларҙа ҡатнашҡан, яраланып, өс ай госпиталдә дауаланған. Һуңынан кире часына ҡайтып, хеҙмәтен дауам иткән. Өс йылдан һуң ул хеҙмәтен кесе сержант дәрәжәһендә һәм взвод командиры урынбаҫары вазифаһында тамамлап, һаулығы буйынса отставкаға сыҡҡан. Тыуған яғына әйләнеп ҡайтҡас, тәүҙә Урмияҙҙағы нефть предприятиеһында, аҙаҡ Иркутск өлкәһендә вахта ысулы менән эшләй. Өлөшләтә мобилизация иғлан ителер алдынан ғына "Олеокемикс"ҡа мастер булып эшкә урынлашҡан була. 2022 йылдың сентябрендә үҙ ирке менән махсус хәрби операцияға китеү өсөн үҙенә повестка яҙҙырып ала. Ошоға тиклем дә хәрби операцияларҙа ҡатнашҡас, алда нимә көткәнен бик яҡшы аңлап, ҡабаттан яуға барырға ныҡлы ҡарар ҡабул итә.

Лейтенант, хәрби частың разведка начальнигы “Нурик” ике йыл хеҙмәт итеү осоронда хәрби оҫталыҡ, батырлыҡ һәм фиҙаҡәрлек өлгөһөн күрһәтә. Ҡыйыу егеттең күкрәген биҙәгән "Батырлыҡ өсөн", "Һәләк булғандарҙы ҡотҡарған өсөн" миҙалдары быға асыҡ дәлил. Ә яңыраҡ район хакимиәте башлығы Динис Йосопов махсус хәрби операция зонаһына барып, уға генерал Шайморатов орденын тапшырған! Афарин, "Нурик"!

Ҡаһарман яҡташыбыҙ менән ғорурланып, уның имен-һау ҡайтыуын теләйбеҙ!