Мәңге уңалмаҫлыҡ яра

Бөгөн Рәсәйҙең хәрби тарихында иҫтәлекле дата – совет ғәскәрҙәрен Афғанстандан алып сығыу көнө. Йыл һайын хәрби бурысын илебеҙҙән ситтә үтәп, ҡайта алмаған яҡташтарыбыҙҙы иҫкә алып, яугир-интернационалистарыбыҙға оло рәхмәттәр еткереп, хөрмәт күрһәтәбеҙ. Был һуғыш ветерандары утыҙ дүрт-утыҙ биш йыл элек һөлөктәй йәш егеттәр булһа, бөгөн улар - сәстәрен сал алған, олпатланған ир уҙамандары.

Район үҙәгендәге Еңеү паркына халыҡ ағыла, яугирҙарҙың түштәрендә миҙалдары сыңлап-сыңлап ала, яндағыларының йөҙҙәрен уйсанлата.

Митингыла район хакимиәте башлығы Айҙар Әнғәм улы Шәйҙуллин, уның урынбаҫары – яугир-интернационалист Рәмил Карам улы Вәлинуров, хәрби комиссар Александр Викторович Аксенов, мәктәп уҡыусылары, йәш армеецтар һәм башҡа битараф булмаған ҡариҙелдәр ҡатнашы. Улар Ҡариҙелдән ҡатнашҡан 100-ҙән ашыу һалдаттарҙы хөрмәт менән иҫкә алды, яуҙаштары хөрмәтенә ҡуйылған һәйкәлгә сәскәләр һалды. Шул ваҡыттағы ваҡиғалар бәлки әкренләп онотолалыр, әммә күптәребеҙҙең хәтерендә ул мәңге уңалмаҫлыҡ яра булып ҡала.

Гөлнара Солтанова.