Кескәйҙәр үткәрелгән сараларҙа әүҙем ҡатнаша

Ошо карантин көндәрендә Асҡын 2-се балалар баҡсаһы тәрбиәселәре лә тәрбиәләнеүселәре менән дистанцион рәүештә төрлө конкурстар, акциялар үткәрә. Ҡыҙҙар һәм малайҙар Космонавтика көнөнә арналған “Космик оҫтахана”, шулай уҡ “Өйҙә һүрәт төшөрәбеҙ”, “Беҙ — ярҙамсылар”, “Әкиәттәр уҡыйбыҙ”, “Өйҙә уҡыйбыҙ”, “ЗарядкаСпортФизкультура” акцияларында әүҙем ҡатнашып, төшөргән һүрәттәрен ебәрә.

Башҡортостан Республикаһы халыҡтарының Милли кейем көнө уңайынан да балалар баҡсаһында башҡорт телен өйрәнеү буйынса түңәрәк алып барыусы Ләйсән Зөфәр ҡыҙы Ғәлимова тәрбиәләнеүселәре араһында һүрәт төшөрөү ойошторҙо. Ҡыҙҙар һәм малайҙар ҙур ҡыҙыҡһыныу һәм теләк менән ҡушылып, үҙҙәренең эштәрен балалар баҡсаһы сайтына ебәрҙе.