Барыһы ла – үҙебеҙҙең ҡулда!

Әгәр беҙҙең телебеҙ ҡасандыр юҡҡа сығып, бөгөнгә килеп етмәгән, тип күҙ алдына баҫтырһаҡ, халҡыбыҙҙың күпме ауыҙ-тел мираҫын белмәҫ, "Урал батыр", "Аҡбуҙат" һәм башҡа донъя кимәлендәге хазиналарға эйә булмаҫ, телһеҙ халҡым милләт булараҡ юҡҡа сығыр ине. Шөкөр, бындай аяныс хәлгә төшмәгәнбеҙ, ата-бабаларыбыҙ милләтебеҙ йәшәһен өсөн бар көсөн һалған, ғүмерен аямаған.

Бөгөнгө ысынбарлыҡ ныҡ хәүеф­ләндерә. Атаһы ла, әсәһе лә башҡорт булып та үҙенең балаһы менән урамда урыҫса һөйләшеп килгән йәштәрҙе күреп, йән әрней. Башҡорт инәйе, олатайы үҙенең ейән-ейәнсәренә вата-емерә урыҫ телендә ниҙер аңлатырға тырыша. Былар – ғәҙәти күренеш. Артабан да шулай дауам итһә, киләсәктә ни күрербеҙ? Ошо быуат менән беҙҙең телебеҙ ҙә тарихта тороп ҡалмаҫмы?
Хөрмәтле инәй-олатайҙар, ағай-апайҙар, йәштәштәрем! Телебеҙ киләсәге – беҙҙең ҡулда! Милләтте ихтирам итеп, башҡортса матбуғат баҫмаларын алдырып уҡыһаҡ, үҙ телебеҙҙә аралашһаҡ, бер-беребеҙгә ҡулдан килгәнсә ярҙам итеп йәшәһәк, беҙгә бер кем дә рухлы, туған телле, бай күңелле халыҡ булырға ҡамасаулай алмаҫ.

Әйткәндәй, минең әнейем (иҫкәрмә: “әней” – башҡорт һүҙе, Ейәнсура яҡтары диалекты, автор шул көйөнсә яҙыуҙы һораған) "Йәшлек"те уҡый, уның һәр һаны хазинаға тиң, ти.

Барыһы – үҙебеҙҙең ҡулда!

Болондарға сыҡһам хайран ҡалам
Меңәрләгән сәскә төрөнә.
Миңә улар ерҙә милләттәрҙең
Сағылышы булып күренә.
Сәскәләрҙе ҡарап, беҙ таныйбыҙ
Фиғелен, еҫен һәм төҫөн.
Ә милләтте ерҙә милләт итеп
Йәшәү бүләк иткән тел генә.
Хоҙай, бәлки, бушҡа яралтмаған
Ел ыңғайы елгән ҡамғағын.
Илен-телен онотҡан бәндәләр, тим,
Ҡамғаҡ икәнлеген аңлаһын.
Үҙ телебеҙҙә аралашмаһаҡ,
Ярҙам итмәҫ бер ниндәй ғиллә лә.
Башҡортомдоң ул-ҡыҙҙары булып
Тел дә тыуһын ине ғаиләлә!

Ғайсар ҠАНСУРИН,
Рәми Ғарипов исемендәге
1-се республика башҡорт гимназия-интернатының XI "Б" класы уҡыусыһы.