Бөтә яңылыҡтар
Үәт, исмаһам!
8 Сентябрь 2017, 12:43

Донъяға матурлыҡ өләшәләр

Сәскәләр үҫтереү өсөн гөл телен белеү кәрәк

Рәшиҙә Саҙретдинова Ҡариҙел районы Ҡараяр мәҙәниәт йортонда егерме йылдан ашыу эшләп, халыҡты бихисап матур байрамдар, ял кисәләре менән ҡыуандырҙы. Абруй ҡаҙанған, хөрмәт яулаған ҡатын хаҡлы ялда ла матурлыҡҡа ынтыла, кешеләрҙе шатландыра. «Баҡса үҫтерергә яратам. Сәскәләргә айырыуса иғтибар бирәм. Тәрбиәләп ҡарағас, бик матурҙар, төҫтәре сағыу, һабаҡтары ныҡ. Бигерәк тә рауза сәскәләрен яратам. Үҫентеләрен ауылдаштарыма ла бирәм», — ти ул.

Күп йылдар Иҫке Балтас ауылында район хәбәрсеһе булып эшләгән Розалия Ғәлләмованы ысынлап та «сәскәләр батшабикәһе» тип атап була. Сөнки уның өйөндә ниндәй генә гөлдәр үҫмәй. Ә инде баҡсаһына сыҡһаң, бөтөнләй иҫең китер! Астра, георгин, нәркәс, петуниянан тыш, үрмәләп үҫкәндәре лә етерлек. Шулай ҙа Розалия апайҙың иң яратҡан сәскәләре — раузалар. Уларҙың да ниндәй генә сорттары юҡ бында. Һәр сәскәнең «холҡо», уларҙы тәрбиәләү нескәлектәре тураһында һөйләп китһә, күҙҙәрендә нурҙар уйнай Розалия апайҙың.

Мишкә ауылында йәшәүсе Рүсә Әхмәҙиеваның бар булмышы — матурлыҡҡа ынтылыу. Ул ҡатын-ҡыҙҙарҙы заманса һәм зауыҡлы әйберҙәр менән тәьмин итә. Йортонда ла үҙен матурлыҡ менән уратҡан — бөтә күңелен биреп, сәскәләр үҫтерә. Бигерәк тә баҡса батшаһы раузаларҙы ярата ул.

Асҡын ауылында йәшәүсе Ғәйнулла Ғилметдиновтың йорто, ихатаһы күп ҡатын-ҡыҙҙар өсөн өлгө булырлыҡ, тиһәм саҡ ҡына ла арттырыу булмаҫ. Ике улы менән йәшәгән ағайҙың йорт тирәһендә тулы тәртип булып, бөтә ер сәскәләргә күмелгән. Бигерәк тә ялҡын төҫөндәге георгиндары күп һәм улар кәртә аша күренеп, әллә ҡайҙан иғтибарҙы йәлеп итә. «Гөлдәр яратырға тормош иптәшем Мәүжидәнән өйрәндем. Улар хуш еҫтәрен таратып, мине эшкә оҙата һәм ҡаршы ала. Тәҙрә төбө лә гөлдәрһеҙ булырға тейеш түгел, тип иҫәпләйем. Донъяла матурлыҡ күп булһын!», — ти ул.